રાજકોટમાં હવામાન વિભાગની આગાહી વચ્ચે વાતાવરણમાં પલટો આવ્યો હતો અને શહેરના સેન્ટ્રલ, વેસ્ટ તેમજ ઈસ્ટ ઝોનમાં માત્ર પોણા બે ઈંચ જેટલો સામાન્ય વરસાદ ખાબક્યો હતો. પરંતુ આ સામાન્ય વરસાદમાં જ રાજકોટ મહાનગરપાલિકા દ્વારા કરવામાં આવેલી પ્રી-મોન્સૂન કામગીરીની પોલ ખૂલી ગઈ છે. શહેરના મુખ્ય માર્ગો પર નદીઓની જેમ પાણી વહેતા થઈ ગયા હતા અને અનેક નીચાણવાળા વિસ્તારોમાં ગોઠણસમા પાણી ભરાઈ જતાં શહેરીજનોને ભારે હાલાકી ભોગવવી પડી હતી. લોકસંસદ વિચાર મંચના આગેવાનોએ આરોપ લગાવ્યો છે કે મનપા દ્વારા કુદરતી વોકળાઓ બુરી દેવામાં આવતા આ ગંભીર સ્થિતિ સર્જાઈ છે.
લોકસંસદ વિચાર મંચના ગજેન્દ્રસિંહ ઝાલાએ જણાવ્યું હતું કે મનપા વરસાદી પાણીના નિકાલની વ્યવસ્થામાં સદંતર નિષ્ફળ રહી છે. શહેરના મવડી તરફના બાપા સીતારામ ચોક, એસ્ટોન નાલુ, હેમુ ગઢવી હોલ પાસે, સોરઠીયા વાડી, માસ્તર સોસાયટી, હસનવાડી, નંદા હોલ અને પોપટપરા નાલુ સહિતના વિસ્તારોમાં પાણી ભરાઈ જવાથી વાહનવ્યવહાર ઠપ્પ થઈ ગયો હતો અને રસ્તાઓ બંધ કરવા પડ્યા હતા. તંત્ર દ્વારા કુદરતી વોકળાઓ પર પુરાણ કરીને દબાણો થવા દેવાયા છે તેમજ બિલ્ડિંગો બનાવી દેવાતાં પાણીના પ્રાકૃતિક પ્રવાહમાં અવરોધ ઊભો થયો છે. આ ઉપરાંત ‘સ્ટ્રોમ વોટર સિસ્ટમ’ના નામે કરોડો રૂપિયાનો ધુમાડો કરવા છતાં આ સિસ્ટમ નિષ્ફળ સાબિત થઈ છે.
ઘટના સંબંધિત મહત્વની બાબતો:
-
નવા પ્રોજેક્ટનો વિરોધ: વોર્ડ નંબર 14 ના જૂના પારડી માર્ગ પર આવેલા કુદરતી વોકળા પર બોક્સ કલવર્ટ બનાવી બે માળનો કોમ્યુનિટી હોલ અને ફાયર સ્ટેશન બનાવવાની હિલચાલ સામે સ્થાનિકો સખત વિરોધ કરી રહ્યા છે.
-
પૂર અને હિજરતનો ભય: આ વિસ્તારમાં 15 કિલોમીટર દૂરથી પાણીનો ધસમસતો પ્રવાહ આવતો હોવાથી સામાન્ય વરસાદમાં પણ પૂર જેવી સ્થિતિ સર્જાય છે, જેથી ભારે વરસાદમાં સ્થાનિકોને હિજરત કરવી પડે તેમ છે.
-
આંદોલનની ચીમકી: કોઠારીયા કોલોની અને વાણીયાવાડી વચ્ચેના આ વોકળા પર બિલ્ડિંગ બનાવવાનો નિર્ણય તુરંત રદ કરવામાં નહીં આવે તો કોઠારીયા કોલોની યુવા ગ્રુપ અને જાગૃત નાગરિકો દ્વારા ઉગ્ર આંદોલન કરવાની ચીમકી આપવામાં આવી છે.
તંત્રની આવી ધૃતરાષ્ટ્ર નીતિ અને વોકળાઓ પરના દબાણોને કારણે આજે સામાન્ય વરસાદમાં પણ રાજકોટવાસીઓ મુશ્કેલીનો સામનો કરવા મજબૂર બન્યા છે.
