સ્પાઈસજેટની દિલ્હીથી દુબઈ જતી બે ફ્લાઈટ્સ 24 કલાકથી પણ વધુ સમયથી મોડી પડતાં અંદાજે 200 જેટલા પ્રવાસીઓ ભારે આક્રોશ સાથે દિલ્હી એરપોર્ટના ટર્મિનલ-3 ખાતે જમીન પર બેસીને ધરણાં પર ઉતરી આવ્યા છે. પ્રવાસીઓને કોઈ ચોક્કસ કારણ આપ્યા વિના વારંવાર ફ્લાઈટના સમયમાં ફેરફાર કરવામાં આવી રહ્યો હતો અને મંગળવાર બપોર સુધી બંને ફ્લાઈટ ટેકઓફ કરી શકી નહોતી, જેના કારણે મુસાફરો ભારે હેરાનગતિનો સામનો કરી રહ્યા છે.
જે ફ્લાઈટ્સ મોડી પડી છે તેમાં સોમવારે સવારે 8:30 વાગ્યે ટેકઓફ થઈને બપોરે 11:15 વાગ્યે દુબઈ પહોંચનારી ફ્લાઈટ SG 5111 અને સોમવારે રાત્રે 10:10 વાગ્યે ટેકઓફ થઈને રાત્રે 12:55 વાગ્યે પહોંચનારી ફ્લાઈટ SG 5105 નો સમાવેશ થાય છે. સ્પાઈસજેટના સ્પષ્ટતા અનુસાર, એક વિમાન ગ્રાઉન્ડેડ (ટેક્નિકલ કે સુરક્ષા કારણોસર અટકાવાયેલું) થવાના લીધે ઓપરેશનલ કારણોસર આ વિલંબ થયો હતો અને હવે મુસાફરોને વૈકલ્પિક ફ્લાઈટ્સ દ્વારા મોકલવાની વ્યવસ્થા કરવામાં આવી રહી છે.
સમયસર ફ્લાઈટ સેવાઓ મામલે સ્પાઈસજેટની સ્થિતિ:
-
જુલાઈ મહિનાનો પર્ફોર્મન્સ: જુલાઈમાં સ્પાઈસજેટની માત્ર 34.5% ફ્લાઈટ્સ સમયસર હતી, જ્યારે ઈન્ડિગોની 91.2%, અકાસા એરની 90.8% અને એર ઈન્ડિયા ગ્રુપની 86.5% ફ્લાઈટ્સ સમયસર રહી હતી.
-
ઓગસ્ટ મહિનામાં સુધારો: ઓગસ્ટમાં સ્પાઈસજેટનું પરફોર્મન્સ સુધરીને 68.2% એ પહોંચ્યું હતું અને તેની બજાર ભાગીદારી વધીને 2% થઈ હતી.
-
અન્ય એરલાઈન્સથી પાછળ: ઓગસ્ટમાં સુધારા છતાં સ્પાઈસજેટ ઈન્ડિગો (90.6%), અકાસા એર (87%) અને એર ઈન્ડિયા ગ્રુપ (84.5%) કરતાં ઘણી પાછળ જોવા મળી હતી.
વારંવાર ફ્લાઈટ શેડ્યુલમાં ફેરફાર થવાથી અને એરપોર્ટ પર કલાકો સુધી અટવાઈ પડવાને કારણે પ્રવાસીઓમાં સ્પાઈસજેટ વિરુદ્ધ ભારે રોષ વ્યાપી ગયો છે.
