Gold Price Today: સોનું ઘટીને 1 લાખ સુધી પહોંચશે? કેમ સસ્તું થઈ રહ્યું છે Gold, આ છે 4 કારણો
તહેવારો અને લગ્નની સિઝન નજીક છે ત્યારે સોનાના ભાવમાં જોવા મળી રહેલા તીવ્ર ઘટાડાથી ખરીદદારોમાં ઉત્સુકતા અને મૂંઝવણ બંને જોવા મળી રહી છે. આંતરરાષ્ટ્રીય અને સ્થાનિક બજારમાં રેકોર્ડ ઉંચાઈ બાદ સોનાની કિંમતોમાં મોટું કરેક્શન આવ્યું છે. સ્થાનિક બજાર (MCX) માં ઓગસ્ટના શિખરથી સોનું ૧૦% થી વધુ નીચે આવી ચૂક્યું છે.
સોનામાં તાજેતરના ઘટાડા પાછળના ૪ મુખ્ય કારણો:
-
૧. પ્રોફિટ બુકિંગ અને નફારૂપી વેચવાલી: સોનું રેકોર્ડ સપાટીએ પહોંચ્યા બાદ રોકાણકારો દ્વારા નફો અંકિત કરવા માટે મોટાપાયે વેચવાલી કરવામાં આવી, જેનાથી કિંમતો પર દબાણ વધ્યું.
-
૨. અમેરિકી મોંઘવારી અને વ્યાજદરની ચિંતા: યુએસ મોંઘવારી અને ફેડરલ રિઝર્વના વ્યાજદર અંગેના કડક વલણની આશંકાઓને કારણે રોકાણકારોનું વલણ બદલાયું છે.
-
૩. બોન્ડ યીલ્ડમાં વધારો: અમેરિકી ૧૦-વર્ષીય બોન્ડની રિયલ યીલ્ડમાં ઝડપી વધારો થવાને કારણે વ્યાજ ન આપનારું સોનું રોકાણકારો માટે સરખામણીએ ઓછું આકર્ષક બન્યું છે.
-
૪. ડૉલરમાં મજબૂતી: વૈશ્વિક સ્તરે ડૉલર ઇન્ડેક્સ મજબૂત થવાથી આંતરરાષ્ટ્રીય બજારમાં સોનાના ભાવ દબાણ હેઠળ આવ્યા છે.
શું સોનું ૧ લાખ કે ૧.૨૫ લાખ સુધી ગગડી શકે? (એક્સપર્ટ્સનો અભિપ્રાય)
-
૧ લાખ રૂપિયા સુધીની શક્યતા નહિવત: નિષ્ણાતોના મતે સોનું ૧ લાખ રૂપિયા પ્રતિ ૧૦ ગ્રામ સુધી પહોંચવું અત્યંત અસંભવ છે, કારણ કે તેના માટે આંતરરાષ્ટ્રીય ભાવ ઘટીને ૨,૮૦0 ડોલર પ્રતિ ઔંસ આસપાસ જવું પડે. હાલમાં સેન્ટ્રલ બેંકોની ખરીદી, વૈશ્વિક ભૌગોલિક તણાવ (Geopolitical Tensions) અને ડી-ડૉલરાઈઝેશન જેવા સ્ટ્રક્ચરલ પરિબળો સોનાને મજબૂત ટેકો પૂરો પાડી રહ્યા છે.
-
શોર્ટ ટર્મમાં મર્યાદિત કરેક્શન: ટૂંકા ગાળામાં આંતરરાષ્ટ્રીય બજારમાં સોનું ૪,૦૨૫ થી ૩,૯૫0 ડોલર પ્રતિ ઔંસ સુધી જઈ શકે છે, જેની અસરથી MCX પર ભાવ આશરે ૧,૪૪,૫૦0 થી ૧,૪૬,૨00 રૂપિયા પ્રતિ ૧૦ ગ્રામ સુધી આવી શકે છે. જોકે, ૧.૨૫ લાખ કે ૧.૩૪ લાખના નીચલા સ્તરો જોવા માટે અમેરિકી બોન્ડ યીલ્ડ અને મોંઘવારીમાં અસાધારણ ફેરફારો થવા અનિવાર્ય છે.
ભારતીય બજાર પર તેની શું અસર થશે?
ભારતમાં આંતરરાષ્ટ્રીય બજારની સરખામણીએ ભાવ ઘટાડો થોડો સીમિત રહી શકે છે. આગામી સમયમાં તહેવારો અને લગ્નસરાની સિઝનને કારણે સ્થાનિક માંગ (Local Demand) વધવાની પૂરી સંભાવના છે, જે કિંમતોને મોટો સપોર્ટ પૂરો પાડશે.
