જિયોની છ લાખ ગામોમાં ઈન્ટરનેટ, 1600 સેટેલાઈટ છોડવાની યોજના
ભારત ઝડપથી ડિજિટલ ઈન્ડિયા બની રહ્યો છે, પરંતુ હજુ પણ અનેક અંતરિયાળ વિસ્તારો, ટાપુઓ અને સરહદી ક્ષેત્રોમાં નેટવર્ક પહોંચાડવું પડકારજનક છે. આ સમસ્યાના ઉકેલ માટે રિલાયન્સ જિયોએ દેશના ૬ લાખથી વધુ ગામો સુધી સેટેલાઈટ ઈન્ટરનેટ પહોંચાડવાની મહત્ત્વાકાંક્ષી યોજના તૈયાર કરી છે.
જિયોની સેટેલાઈટ ઈન્ટરનેટ યોજનાની મુખ્ય વિશેષતાઓ:
-
૧૬૦૦ લો અર્થ ઓર્બિટ સેટેલાઈટ: જિયોની પ્રસ્તાવિત યોજના હેઠળ પૃથ્વીની નીચલી કક્ષામાં આશરે ૧,૬૦૦ સેટેલાઈટ છોડવામાં આવશે, જે અંતરિયાળ વિસ્તારો, સમુદ્રી ક્ષેત્રો અને ટાપુઓ પર હાઇ-સ્પીડ ઈન્ટરનેટ અને મોબાઈલ કનેક્ટિવિટી પૂરી પાડશે.
-
૨૩ ગ્રાઉન્ડ સ્ટેશનનું નિર્માણ: આ સેટેલાઈટ નેટવર્કને જમીન પરના હયાત ઈન્ફ્રાસ્ટ્રક્ચર સાથે જોડવા માટે ભારતમાં ૨૩ ગ્રાઉન્ડ સ્ટેશન બનાવવામાં આવશે, જે સેટેલાઈટ અને ધરતી પરની કમ્યુનિકેશન સિસ્ટમ વચ્ચે સેતુનું કામ કરશે.
-
હાઈબ્રિડ નેટવર્ક મોડેલ: આ યોજનાનો મુખ્ય આશય જમીન પરના મોબાઈલ અને ફાઈબર નેટવર્ક સાથે સેટેલાઈટ ઈન્ટરનેટને એકબીજા સાથે જોડવાનો છે.
સરકારનું વલણ અને સેટેલાઈટ ઈન્ટરનેટ બજાર:
ટેલિકોમ મંત્રી જ્યોતિરાદિત્ય સિંધિયાએ સ્પષ્ટ કર્યું છે કે ભારત સરકાર કોઈપણ સેક્ટરમાં મોનોપોલી (ઈજારો) ને મંજૂરી આપતી નથી. સ્ટારલિંકના પ્રવેશ અંગેના આક્ષેપો વચ્ચે સરકારે સ્પષ્ટ કર્યું છે કે જિયો, વનવેબ અને સ્ટારલિંક ત્રણેય કંપનીઓને સેટકોમ લાઈસન્સ મળી ચૂક્યા છે, જ્યારે એમેઝોન પણ આ પ્રક્રિયામાં છે. તમામ કંપનીઓએ વ્યાપારી કામગીરી શરૂ કરતા પહેલાં સુરક્ષા અને નિયમનકારી જરૂરિયાતોનું પાલન કરવું પડશે.
