અમદાવાદમાં અંધશ્રદ્ધાનો ખૌફનાક ખેલ: બીમાર દીકરીને સાજી કરવા પરિવારે ભુવાજીને સોંપી, પાખંડીએ વિધિના નામે ગુજાર્યું દુષ્કર્મ

અમદાવાદમાંથી અંધશ્રદ્ધા અને માનવતાને શરમાવે તેવી એક હૃદયકંપાવનારી ઘટના સામે આવી છે. સોલા વિસ્તારમાં વારંવાર બીમાર પડતી 15 વર્ષની માસૂમ સગીરાને વળગાડ હોવાની આશંકાએ પરિવારજનોએ જે ભુવાજીનો સંપર્ક કર્યો હતો, તે ભુવો જ નરાધમ નીકળ્યો હતો. તાંત્રિક વિધિના બહાને પાખંડી ભુવાએ સગીરાને ઘેનની ગોળીઓ આપી વારંવાર પોતાની હવસનો શિકાર બનાવી હતી. સોલા પોલીસે આરોપી ભુવાની ધરપકડ કરી કાયદેસરની કાર્યવાહી હાથ ધરી છે.

કેફી ગોળીઓ આપી કુકર્મ: નવેમ્બર 2025 માં આરોપી ભુવાજી ચંદ્રેશ પંચાલ વિધિ કરવાના બહાને સગીરાના ઘરે પહોંચ્યો હતો. પરિવારજનોને બહાર બેસાડી તેણે માસૂમ સગીરાને પાણીમાં ઘેનની ગોળીઓ પીવડાવી અર્ધબેભાન કરી દુષ્કર્મ ગુજાર્યું હતું.
અવારનવાર શોષણ: વિધિ પૂર્ણ ન થયાનું બહાનું બતાવી આરોપીએ ત્રણ મહિનામાં 4 થી 5 વખત સગીરા સાથે આ હીન કૃત્ય આચર્યું હતું. જાન્યુઆરી 2026 માં તેણે વળગાડ દૂર થયો હોવાનો દાવો કર્યો હતો.
પિતાને અમીર બનાવવાની લાલચ: ભુવાએ સગીરાના પિતાની આર્થિક સ્થિતિ સુધારવાની વિધિના નામે પણ સગીરાને પોતાના ઘરે બોલાવી 2 થી 3 વાર દુષ્કર્મ આચર્યું હતું.

ફોટોગ્રાફ્સથી ખુલાસો: ગત 15 ઓગસ્ટે આરોપી ભુવાજી અને સગીરાના કેટલાક ફોટા સોશિયલ મીડિયા પર વાયરલ થતાં પરિવારને શંકા ગઈ હતી.
સગીરાની આપવીતી: પરિવારજનોએ પૂછપરછ કરતાં સગીરાએ રડતાં રડતાં ભુવાજીના આતંક અને વિધિના નામે આચરાયેલા દુષ્કર્મની પૂરી સત્યતા જણાવી હતી, જેના આધારે સોલા પોલીસ સ્ટેશનમાં ફરિયાદ નોંધાવાઈ હતી.

રીઢો ગુનેગાર: પોલીસ તપાસમાં સામે આવ્યું છે કે પકડાયેલો આરોપી ચંદ્રેશ પંચાલ પોતે પરિણીત છે અને એક બાળકનો પિતા છે.
ઠગાઈના 4 કેસ: આરોપી સામે અગાઉ રામોલ, સોલા, ઘાટલોડિયા અને માંડલ પોલીસ સ્ટેશનમાં વિધિના નામે લોકો સાથે રૂ. 56 લાખની ઠગાઈ કરવાના 4 ગુના નોંધાઈ ચૂક્યા છે. સોલા પોલીસે હાલ આ નરાધમની ધરપકડ કરી આગળની કાયદેસરની તપાસ ચલાવી રહી છે.