સૌરાષ્ટ્રના લોકપ્રિય તહેવાર જન્માષ્ટમી પૂર્વે રાજકોટમાં ખાનગી મેળાઓના આયોજન માટે તૈયારીઓ ચાલુ થઈ ગઈ છે. જોકે, TRP ગેમઝોન દુર્ઘટના બાદ રાજ્ય સરકાર દ્વારા જાહેર કરાયેલી નવી SOP ના પગલે આ વખતે ખાનગી મેળાઓના આયોજકો માટે નિયમો અત્યંત કડક બનાવવામાં આવ્યા છે. પોલીસ કમિશનર દ્વારા રચાયેલી 13 સભ્યોની ‘સિટી રાઇડ્સ સેફ્ટી અને ઇન્સ્પેક્શન કમિટી’ની ગ્રાઉન્ડ ચકાસણી અને મંજૂરી વગર કોઈપણ ખાનગી મેળાને સત્તાવાર પરવાનગી આપવામાં આવશે નહીં.
13 સભ્યોની કમિટી કરશે ગ્રાઉન્ડ ચકાસણી
-
કડક સુરક્ષા વ્યવસ્થા: કમિટી દ્વારા મેળાના સ્થળની ભૌતિક ચકાસણી, રાઈડ્સની મજબૂતી અને સુરક્ષા સાધનોની સમીક્ષા કર્યા બાદ જ સકારાત્મક અભિપ્રાય આપવામાં આવશે.
-
હજુ સુધી એકપણ મંજૂરી નહીં: કડક નિયમોના કારણે હાલના તબક્કે રાજકોટ શહેરના એક પણ ખાનગી મેળાને સત્તાવાર લાયસન્સ કે પરવાનગી મળી નથી.
ગત વર્ષની જેમ 5 મેળાઓનું આયોજન, મંજૂરી પ્રક્રિયા પ્રગતિમાં
-
અરજી પ્રક્રિયા શરૂ: રાજકોટમાં દર વર્ષે શ્રાવણ માસ દરમિયાન સાતમ-આઠમના તહેવારોમાં આશરે એક મહિના સુધી ખાનગી મેળાઓ ચાલે છે. ગત વર્ષની જેમ આ વર્ષે પણ 5 ખાનગી મેળાઓના આયોજન માટે અરજી પ્રક્રિયા હાથ ધરવામાં આવી છે.
-
ડીસીપી ક્રાઇમનું નિવેદન: રાજકોટ ડીસીપી ક્રાઇમ જગદીશ બાંગરવાએ જણાવ્યું હતું કે, ગેમિંગ ઝોન અને મનોરંજન રાઇડ્સ માટે સરકારના નવા જાહેરનામા મુજબ જ આગળની કાર્યવાહી કરવામાં આવી રહી છે. કાયદેસરનું લાયસન્સ મેળવ્યા બાદ જ આયોજકો મેળા ખુલ્લા મૂકી શકશે.
15 દસ્તાવેજો અને દરેક રાઈડ પર 5×5 ફૂટનું બોર્ડ ફરજિયાત
-
15 દસ્તાવેજોની જરૂરિયાત: આયોજકોએ પરમિશન મેળવવા માટે ફાયર સેફ્ટી, સ્ટ્રક્ચરલ સ્ટેબિલિટી, ઇલેક્ટ્રિકલ સેફ્ટી સહિત કુલ 15 જેટલા વિવિધ મંજૂરી દસ્તાવેજો રજૂ કરવાના રહેશે.
-
માહિતી બોર્ડ: સુરક્ષાના ભાગરૂપે દરેક રાઈડના પ્રવેશદ્વાર પર 5×5 ફૂટનું માહિતી બોર્ડ લગાડવું ફરજિયાત બનાવવામાં આવ્યું છે, જેમાં રાઈડની ક્ષમતા, ઉંમરની મર્યાદા અને સુરક્ષા સૂચનાઓ સ્પષ્ટ ભાષામાં દર્શાવવાની રહેશે.
