ગુજરાતમાં પૂર્વ અગ્નિવીરો માટે મોટા સમાચાર: પોલીસ ભરતીમાં સીધી એન્ટ્રી, લેખિત પરીક્ષા વગર ૨૦% અનામતની જોગવાઈ

ગુજરાતમાં પૂર્વ અગ્નિવીરો માટે મોટા સમાચાર: પોલીસ ભરતીમાં સીધી એન્ટ્રી, લેખિત પરીક્ષા વગર 20% અનામતની જોગવાઈ

ગુજરાત સરકારે દેશસેવા કરીને પરત ફરેલા પૂર્વ અગ્નિવીરો માટે પોલીસ વિભાગમાં ભરતી બાબતે એક ખૂબ જ મહત્ત્વપૂર્ણ અને રાહતરૂપ નિર્ણય લીધો છે. ગૃહ રાજ્યમંત્રી હર્ષ સંઘવી દ્વારા કરવામાં આવેલી જાહેરાત અનુસાર, હવે ભૂતપૂર્વ અગ્નિવીરોને પોલીસ વિભાગની વિવિધ ગણવેશધારી જગ્યાઓ પર સીધી ભરતી પ્રક્રિયામાં લેખિત પરીક્ષા અને શારીરિક કસોટીમાંથી મુક્તિ આપવામાં આવશે. ગૃહ વિભાગ દ્વારા ૯ ઓક્ટોબર, ૨૦૨૬ના રોજ આ અંગેના સુધારા નિયમો પણ જાહેર કરી દેવામાં આવ્યા છે.

પૂર્વ અગ્નિવીરોને કયા પદો પર મળશે નોકરી? સરકારના આ નવા નિયમો અંતર્ગત પૂર્વ અગ્નિવીરો સીધા નીચે મુજબના પદો પર જોડાઈ શકશે:

• હથિયારી PSI

• હથિયારી કોન્સ્ટેબલ

• SRPF કોન્સ્ટેબલ

• જેલર

• જેલ સિપાહી

મુખ્ય જોગવાઈઓ અને છૂટછાટ:

• લેખિત પરીક્ષામાંથી મુક્તિ: અગ્નિવીરોએ હવે પોલીસ ભરતી માટે કોઈ જ લેખિત પરીક્ષા આપવી પડશે નહીં.

• શારીરિક કસોટીમાંથી મુક્તિ: સેનામાં સઘન તાલીમ પામેલા હોવાથી તેઓ અગાઉથી જ શારીરિક સક્ષમતા ધરાવતા હોય છે, તેથી તેમને શારીરિક કસોટીમાંથી પણ મુક્તિ આપવામાં આવી છે.

• ૨૦% અનામતની જોગવાઈ: રાજ્યની પોલીસ ભરતીમાં પૂર્વ અગ્નિવીરો માટે ખાસ ૨૦% જગ્યાઓ અનામત રાખવામાં આવી છે.

• વયમર્યાદામાં વિશેષ છૂટ: પ્રથમ બેચના અગ્નિવીરોને વયમર્યાદામાં ૫ વર્ષની વિશેષ છૂટછાટ પણ આપવામાં આવશે.

સરકારના આ દીર્ઘદ્રષ્ટિપૂર્ણ નિર્ણયથી સશસ્ત્ર દળોમાં સેવા આપી ચૂકેલા યુવાનોને ગુજરાત પોલીસમાં સન્માનજનક કારકિર્દી બનાવવાની ઉત્તમ તક સાંપડશે.