શેરબજારમાં તેજીનો ‘રાસ’: સેન્સેક્સ ૧૧૦૦ અંક વધી ૭૩ હજારને પાર, રોકાણકારોની સંપત્તિમાં ૪ લાખ કરોડથી વધુનો ઉમેરો

શેર બજારમાં તેજીનો ‘રાસ’! સેન્સેક્સ આજે 1100 અંક ચઢી 73 હજારને પાર, રોકાણકારોને 4 કારણોસર 4 લાખ કરોડની કમાણી

ભારતીય શેરબજારમાં મંગળવારે જબરદસ્ત તેજીનો માહોલ જોવા મળ્યો હતો. બપોર પછીના કારોબારમાં બીએસઈ (BSE) સેન્સેક્સ અને એનએસઈ (NSE) નિફ્ટી ૧%થી વધુ ઉછળ્યા હતા. કારોબારના અંતે સેન્સેક્સ ૧,૧૦૯ પોઈન્ટ (૧.૫૪%)ના ઉછાળા સાથે ૭૩,૦૩૩.૭૮ અને નિફ્ટી પ૦ પણ ૩૫૯ પોઈન્ટ (૧.૬૦%) વધીને ૨૨,૭૨૧.૯૫ની સપાટીએ બંધ રહ્યા હતા. આ શાનદાર તેજીના પગલે લિસ્ટેડ કંપનીઓની કુલ સંપત્તિમાં રૂ. ૪.૧૨ લાખ કરોડનો મોટો વધારો થતાં રોકાણકારોની એકંદર સંપત્તિ વધીને રૂ. ૪૭૦ લાખ કરોડના સ્તરે પહોંચી ગઈ છે.

બજારમાં તેજી લાવનારા ૪ મુખ્ય કારણો:

• LTCG અને STT ટેક્સ પર નાણામંત્રીનું સંકેત: નાણામંત્રી નિર્મલા સીતારમણે લોંગ-ટર્મ કેપિટલ ગેઈન્સ (LTCG) અને સિક્યોરિટીઝ ટ્રાન્ઝેક્શન ટેક્સ (STT) અંગે રોકાણકારો સાથે ચર્ચા ચાલી રહી હોવાનું અને સરકાર આ મુદ્દાઓ પર ધ્યાન આપી રહી હોવાનું જણાવાતાં રોકાણકારોનો ઉત્સાહ વધ્યો હતો.

• IT કંપનીઓના શેરોમાં મોટો ઉછાળો: બીજા ત્રિમાસિક ગાળાના સારા પરિણામોના પગલે HCL ટેક અને TCSના શેરોમાં પ-પ% સુધીનો તેમજ ટેક મહિન્દ્રા અને ઈન્ફોસિસમાં ૩-૩%નો ઉછાળો નોંધાયો હતો. વૈશ્વિક સ્તરે એઆઈ (AI) શેરોમાં થયેલા ફેરફારોને કારણે વિદેશી રોકાણકારોનું ધ્યાન ભારતીય IT કંપનીઓ તરફ કેન્દ્રિત થયું છે.

• રૂપિયાની મજબૂતી અને બોન્ડ યીલ્ડમાં ઘટાડો: આરબીઆઈ (RBI)ના ત્વરિત પગલાં બાદ અમેરિકન ડોલર સામે રૂપિયો મજબૂત થયો હતો. ઉપરાંત, અમેરિકન બોન્ડ યીલ્ડ ૫.૨%થી નીચે આવતા શેરબજાર તરફ રોકાણનો પ્રવાહ વધ્યો હતો.

• ક્રૂડ ઓઈલના ભાવમાં ઘટાડો: વૈશ્વિક બજારમાં બ્રિન્ટ ક્રૂડ ઘટતા પ્રતિ બેરલ $૧૦૫ નજીક અને યુએસ WTI ક્રૂડ $૯૩ની નીચે આવી જતાં ભારતીય અર્થતંત્ર અને બજાર માટે સકારાત્મક સ્થિતિ સર્જાઈ હતી.