RTE ના 54 બાળકોને સહાયથી વંચિત રાખનારી સ્કૂલોને પેનલ્ટી, પોર્ટલ પર બાળકોની એન્ટ્રી જ ના કરી
આરટીઈ (RTE) યોજના હેઠળ પ્રવેશ મેળવનાર વિદ્યાર્થીઓને સરકાર દ્વારા દર વર્ષે મળતી ૩ હજાર રૂપિયાની આર્થિક સહાયમાં બેદરકારી દાખવનાર શાળાઓ સામે જિલ્લા શિક્ષણ અધિકારી (DEO) દ્વારા કડક કાર્યવાહી કરવામાં આવી છે. અમદાવાદના સોલા વિસ્તારમાં આવેલી સોલારિસ પબ્લિક સ્કૂલે આરટીઈ પોર્ટલ પર સમયસર બાળકોની એન્ટ્રી ન કરતા કુલ ૫૪ વિદ્યાર્થીઓ આર્થિક સહાયથી વંચિત રહ્યા હતા, જેને લઈને ડીઈઓ દ્વારા સ્કૂલને ૧૦ હજાર રૂપિયાનો દંડ ફટકારવામાં આવ્યો છે.
સમગ્ર મામલાની મુખ્ય વિગતો:
-
વાલીની ફરિયાદથી ભાંડો ફૂટ્યો: ચાલુ વર્ષે આરટીઈ હેઠળના ૮૦ હજારથી વધુ બાળકોને ૩ હજાર રૂપિયાની સહાય ચૂકવી દેવામાં આવી છે. દરમિયાન સોલારિસ પબ્લિક સ્કૂલમાં અભ્યાસ કરતા બાળકોને સહાય ન મળતા એક વાલીએ આ અંગે ફરિયાદ કરી હતી.
-
પોર્ટલ પર એન્ટ્રી ન કરવાથી સહાય અટકી: ડીઈઓ દ્વારા કરવામાં આવેલી તપાસમાં બહાર આવ્યું કે આ સ્કૂલમાં જુદા-જુદા ધોરણોમાં આરટીઈ હેઠળ પ્રવેશ મેળવીને ભણી રહેલા ૫૪ બાળકોની માહિતી સ્કૂલ દ્વારા ‘આરટીઈ ડીબીએમએસ પોર્ટલ’ પર અપડેટ કે એન્ટ્રી કરવામાં જ આવી ન હતી. સ્કૂલની આ ગંભીર લાપરવાહીના કારણે બાળકો સહાયથી વંચિત રહ્યા હતા.
-
દંડ અને આગામી આદેશ: એક્ટની જોગવાઈઓ મુજબ અમદાવાદ શહેર ડીઈઓએ સોલારિસ પબ્લિક સ્કૂલને ૧૦,૦૦ રૂપિયાનો દંડ ફટકાર્યો છે. આ સાથે જ સ્કૂલને તાત્કાલિક ધોરણે તમામ બાળકોની પોર્ટલ પર એન્ટ્રી પૂર્ણ કરવા આદેશ અપાયો છે, જેથી પ્રક્રિયા પૂરી થયા બાદ વિદ્યાર્થીઓને તેમની સહાય મળી શકે.
