ગુજરાતની સ્કૂલોમાં અજાણ્યા લોકોના પ્રવેશ પર સંપૂર્ણ રોક: મંજૂરી વિના રીલ્સ બનાવી તો POCSO હેઠળ ગુનો નોંધાશે
ગાંધીનગર: દાહોદમાં બનેલી દુર્ભાગ્યપૂર્ણ ઘટના બાદ રાજ્યની સરકારી અને કોર્પોરેશન સંચાલિત શાળાઓમાં વિદ્યાર્થીઓની સુરક્ષા તેમજ ગોપનીયતા સુનિશ્ચિત કરવા માટે ગુજરાત સરકારના શિક્ષણ વિભાગે અત્યંત કડક માર્ગદર્શિકા (SOP) જાહેર કરી છે. આ નવા નિયમો મુજબ, હવેથી શાળા પરિસરમાં પ્રવેશવા માટે શાળાના આચાર્ય કે સંસ્થાના વડાની પૂર્વ લેખિત મંજૂરી લેવી ફરજિયાત બનાવવામાં આવી છે. આ ઉપરાંત, મંજૂરી વગર ફોટોગ્રાફી, વીડિયોગ્રાફી, સોશિયલ મીડિયા માટે રીલ્સ કે શોર્ટ વીડિયો બનાવવા પર સંપૂર્ણ પ્રતિબંધ લાદી દેવાયો છે.
શિક્ષણ વિભાગની નવી માર્ગદર્શિકા અંગેની મુખ્ય વિગતો:
-
લેખિત મંજૂરી અને વિઝિટર રજિસ્ટર ફરજિયાત: વાલીઓ, અધિકૃત શૈક્ષણિક અધિકારીઓ અને સંકલનકારો સિવાયના કોઈ પણ બાહ્ય વ્યક્તિએ શાળામાં પ્રવેશતા પહેલાં આચાર્યની લેખિત મંજૂરી મેળવવી પડશે. તેમજ શાળાના મુખ્ય દ્વાર પર રાખેલા રજિસ્ટરમાં પોતાની તમામ વિગતો નોંધાવવી પડશે. આચાર્યની પરવાનગી વગર ક્લાસરૂમ, લેબોરેટરી, હોસ્ટેલ, મેદાન કે શૌચાલય વિસ્તારમાં પ્રવેશી શકાશે નહીં.
-
રીલ્સ, શોર્ટ વીડિયો અને રેકોર્ડિંગ પર રોક: શાળાના સમય દરમિયાન મનોરંજન અર્થે રીલ્સ, શોર્ટ વીડિયો કે લાઈવ સ્ટ્રીમિંગ કરવા પર સંપૂર્ણ મનાઈ ફરમાવવામાં આવી છે. વિદ્યાર્થીઓ, શિક્ષકો કે શૈક્ષણિક પ્રવૃત્તિઓના ફોટો કે વીડિયો લેવા માટે પૂર્વ મંજૂરી અનિવાર્ય રહેશે.
-
કાયદેસરની દંડાત્મક કાર્યવાહી: બાળકોની સુરક્ષા, નૈતિકતા અને ગોપનીયતા જોખમાય તેવી કોઈ પણ પ્રવૃત્તિ કે નિયમભંગ સામે ‘પોક્સો એક્ટ’ (POCSO Act), ‘બાળ સંભાળ અને સંરક્ષણ કાયદા’ તેમજ ‘આઈ.ટી. એક્ટ’ (IT Act) ની કડક કલમો હેઠળ કાયદેસરનો ગુનો દાખલ કરવામાં આવશે.
-
રાજકીય અને સરકારી કાર્યક્રમો પર સવાલો: સરકારના આ પરિપત્ર બાદ સરકારી શાળાઓમાં યોજાતા નેતાઓ, પક્ષના હોદ્દેદારો અને રાજકીય-સરકારી કાર્યક્રમો દરમિયાન બાહ્ય વ્યક્તિઓના પ્રવેશ અને વીડિયોગ્રાફી માટે કેવી પ્રક્રિયા રહેશે તે અંગે પણ ચર્ચાઓ જાગી છે.
-
અન્ય રાજ્યોનું અનુકરણ: ઉલ્લેખનીય છે કે, ગુજરાત પહેલાં દિલ્હી સરકાર (માર્ચ) અને રાજસ્થાન સરકાર (ઓગસ્ટ) પણ આવી જ રીતે શાળાઓમાં બાહ્ય વ્યક્તિઓના પ્રવેશ અને રેકોર્ડિંગ પર નિયંત્રણ મૂકતી માર્ગદર્શિકા અમલી બનાવી ચૂકી છે.
