અમદાવાદ: ચાંગોદરમાં રૂ. ૩.૧૯ લાખની નશાકારક કફ સીરપ સાથે ત્રણ શખસો ઝડપાયયા; એન્ટી નાર્કોટિક્સ વિંગ અને પોલીસના સંયુક્ત ઓપરેશનમાં કાર્યવાહી

અમદાવાદના ચાંગોદરમાં 3.19 લાખની નશાકારક કફ સીરપ સાથે ત્રણ પકડાયા

અમદાવાદ: અમદાવાદ ગ્રામ્યના ચાંગોદર વિસ્તારમાં નશાકારક પદાર્થોના વેચાણ સામે પોલીસ દ્વારા સઘન ઝુંબેશ ચલાવવામાં આવી રહી છે. એન્ટી નાર્કોટિક્સ વિંગ (ANW) અને ચાંગોદર પોલીસે સંયુક્ત રીતે બાતમીના આધારે દરોડો પાડીને પ્રતિબંધિત કોડેઈન યુક્ત નશાકારક કફ સીરપની ૬૦૦ બોટલોનો મોટો જથ્થો ઝડપી પાડ્યો છે. આ ગેરકાયદે પ્રવૃત્તિમાં સંડોવાયેલા ત્રણ શખસોની ધરપકડ કરી પોલીસ દ્વારા કાયદેસરની કાર્યવાહી હાથ ધરવામાં આવી છે.

કાર્યવાહી અને પકડાયેલા આરોપીઓ અંગેની મુખ્ય વિગતો:

• મુદ્દામાલ અને જથ્થો: પોલીસે નશાકારક કફ સીરપની બોટલો ઉપરાંત ગુનામાં વપરાયેલી એક કાર અને ૪ મોબાઇલ ફોન સહિત કુલ રૂ. ૩,૧૯,૦૦૦ નો મુદ્દામાલ જપ્ત કર્યો છે. આરોપીઓ આ જથ્થો ગેરકાયદેસર રીતે ઊંચા ભાવે વેચાણ કરવા માટે હેરાફેરી કરી રહ્યા હતા.

• પકડાયેલા આરોપીઓની ઓળખ: આ પ્રકરણમાં પોલીસે અરબાઝખાન અયુબખાન પઠાણ (રહે. ધોળકા), રમઝાનશા કરીમશા ફકીર (રહે. ધોળકા) અને કીરણ ચૌહાણ (રહે. ડરણ ગામ, સાણંદ) ની ધરપકડ કરી છે.

• NDPS એક્ટ હેઠળ ગુનો: પકડાયેલા તમામ આરોપીઓ વિરુદ્ધ NDPS એક્ટ (નારકોટિક ડ્રગ્સ એન્ડ સાયકોટ્રોપિક સબસ્ટેન્સ એક્ટ) ની કલમો હેઠળ ચાંગોદર પોલીસ સ્ટેશનમાં ગુનો નોંધવામાં આવ્યો છે.

• વધુ તપાસ: આ નશાકારક કફ સીરપનો જથ્થો ક્યાંથી લાવવામાં આવ્યો હતો અને અમદાવાદ કે આસપાસના કયા વિસ્તારોમાં સપ્લાય કરવાનો હતો તે અંગે પોલીસ દ્વારા સઘન પૂછપરછ અને તપાસ જારી રાખવામાં આવી છે.