અમદાવાદના સાબરમતી રિવરફ્રન્ટ ખાતે ચાલી રહેલી વર્લ્ડ આર્ચરી પેરા સિરીઝ 2026માં ભારતીય તીરંદાજોએ શાનદાર શરૂઆત કરી છે. ફાઇનલ્સના પ્રથમ જ દિવસે ભારતે 2 ગોલ્ડ, 2 સિલ્વર અને 3 બ્રોન્ઝ સહિત કુલ 7 મેડલ જીતીને પોતાની તાકાત દર્શાવી છે.
હરવિંદર-વિજય અને તોમન-શ્યામની ગોલ્ડ જીત
રિકર્વ પુરુષ ટીમ ઇવેન્ટમાં હરવિંદર સિંહ અને વિજય સુન્ડીએ સ્લોવાકિયાને 6-2થી હરાવી ગોલ્ડ મેળવ્યો. આ જોડી અગાઉ બેન્કોકમાં પણ ટીમ ગોલ્ડ જીતી ચૂકી છે.
કમ્પાઉન્ડ પુરુષ ટીમમાં તોમન કુમાર અને શ્યામ સુંદર સ્વામીએ ઇરાકને 152-139થી હરાવી ભારતને બીજો ગોલ્ડ અપાવ્યો.
સિલ્વર-બ્રોન્ઝથી પણ મેડલ ટેલીમાં વધારો
ભારતે રિકર્વ મહિલા ટીમ અને W1 મિક્સ્ડ ટીમમાં સિલ્વર મેડલ મેળવ્યા. જ્યારે સ્વાતિ ચૌધરીની વ્યક્તિગત W1 ઇવેન્ટ સહિત ત્રણ કેટેગરીમાં બ્રોન્ઝ મેડલ જીત્યા છે.
પ્રથમ દિવસના પ્રદર્શનથી ભારતીય ટીમનો આત્મવિશ્વાસ વધ્યો છે અને હવે અંતિમ દિવસે મેડલની સંખ્યા વધુ વધારવાની તક છે.
અંતિમ દિવસે શીતલ દેવી સહિત અનેક દાવેદાર
અંતિમ દિવસે શીતલ દેવી વ્યક્તિગત ફાઇનલમાં ઉતરશે. આ ઉપરાંત રિકર્વ મિક્સ્ડ ટીમ સહિત અન્ય ઇવેન્ટ્સમાં પણ ભારતીય ખેલાડીઓ મેડલ માટે મેદાનમાં ઉતરશે. ઘરઆંગણે ભારતની નજર હવે વધુ પોડિયમ ફિનિશ સાથે મેડલ ટેલી વધારવા પર છે.
