સુપ્રીમ કોર્ટના આદેશને પગલે ભુજ શહેરમાં રાહદારીઓ માટે ફૂટપાથ અને માર્ગો દબાણમુક્ત કરાવવાની તંત્ર દ્વારા કડક કાર્યવાહી હાથ ધરવામાં આવી છે. શહેરના અત્યંત વ્યસ્ત એવા હોસ્પિટલ રોડ પરના ગેરકાયદેસર દબાણો દૂર કરી માર્ગ મોકળો કરવાની દિશામાં ભુજ નગરપાલિકાએ ચક્ર ગતિમાન કર્યા છે.
પાલિકાની બેઠકમાં મોટાભાગના ફેરિયા ગેરહાજર રહ્યા
-
ચીફ ઓફિસર દ્વારા બેઠક: સુપ્રીમ કોર્ટના આદેશના પાલન અર્થે લાલટેકરી સ્થિત ડો. વી. એચ. પટેલના દવાખાનાથી PGVCL ગેટ સુધીના હોસ્પિટલ રોડ પર ઊભા રહેતા નોંધાયેલા ફેરિયાઓને કોમર્સ કોલેજ રોડ પર શિફ્ટ કરવા અંગે ચીફ ઓફિસર ટ્વિંકલ પટેલ દ્વારા બેઠક બોલાવાઈ હતી.
-
નજીવી હાજરી: હોસ્પિટલ રોડ વિસ્તારના કુલ 70 જેટલા ફેરિયાઓમાંથી માત્ર 10 ફેરિયા જ આ બેઠકમાં હાજર રહ્યા હતા.
60 ફેરિયાઓને 2 દિવસની આખરી નોટિસ જારી
-
દબાણ શાખાની સખત કાર્યવાહી: ફેરિયાઓની ગેરહાજરીને પગલે પાલિકાના મુખ્ય અધિકારીની સૂચનાથી દબાણ શાખાના કિશોરભાઇ શેખા અને જયદીપસિંહ ઝાલા દ્વારા નોંધાયેલા અને બિન-નોંધાયેલા મળીને 60 ફેરિયાઓને 2 દિવસની નોટિસ પાઠવવામાં આવી છે.
-
અલ્ટીમેટમ: માર્ગો પર ગેરકાયદેસર લારી-ગલ્લા ઊભા રાખી ખાણી-પીણીનો ધંધો કરતા તમામ દબાણકર્તાઓને બે દિવસમાં સ્વેચ્છાએ દબાણ હટાવી લેવા કડક આદેશ કરાયો છે, જેથી આગામી દિવસોમાં હોસ્પિટલ રોડ વાહનચાલકો અને રાહદારીઓ માટે સુગમ બનશે.
