રાજકોટ જિલ્લાના શાપર-વેરાવળ સ્થિત ઉર્જા ઇન્ડસ્ટ્રીયલ વિસ્તારમાં કૌટુંબિક ઝઘડાએ લોહિયાળ સ્વરૂપ ધારણ કર્યું છે. રાત્રિના સમયે થયેલી સામાન્ય બોલાચાલીમાં ઉશ્કેરાયેલા સાઢુએ યુવકને ઢીકાપાટુનો માર મારી ધાબા પરથી નીચે ફેંકી દેતાં ગંભીર રીતે ઘવાયેલા યુવકનું સારવાર દરમિયાન મોત નીપજ્યું છે. પોલીસે આ મામલે હત્યાનો ગુનો નોંધી આરોપી સાઢુની ધરપકડ કરી છે.
પુત્રને ઓરડીએ રાખવા બાબતે ઉશ્કેરાયો સાઢુ
-
બનાવની વિગત: મૂળ ઉત્તર પ્રદેશના અને શાપરમાં મજૂરી કામ કરતા બ્રિજવિહારીસિંગ રાત્રે પત્ની સંજુ અને બાળકો સાથે ઓરડીમાં હતા. દરમિયાન તેમની સાળીનો પુત્ર હિતેશસિંગ ત્યાં આવ્યો હતો.
-
બોલાચાલી અને હુમલો: થોડીવારમાં હિતેશનો પિતા અમરેન્દ્રસિંહ ત્યાં પહોંચ્યો હતો અને પોતાના પુત્રને અહીં કેમ રાખ્યો છે તે મુદ્દે સાઢુ બ્રિજવિહારીસિંગ અને સાળી સંજુ સાથે ઝઘડો કરવા લાગ્યો હતો. બ્રિજવિહારીસિંગે ઝઘડો કરવાની ના પાડતાં ઉશ્કેરાયેલા અમરેન્દ્રસિંહે તેમને ઢીકાપાટુનો માર માર્યો હતો અને બચાવવા વચ્ચે પડેલી સાળીને પણ ધક્કો મારી નીચે પછાડી દીધી હતી.
ધાબા પરથી ફેંકી દેતાં સારવારમાં નીપજ્યું મોત, આરોપી ગિરફ્તાર
-
ધાબા પરથી નીચે ફેંક્યો: આરોપી અમરેન્દ્રસિંહે બ્રિજવિહારીસિંગને માર મારતાં મારતાં ધાબાની દીવાલ પાસે લઈ જઈ સીધા નીચે જમીન પર ફેંકી દીધા હતા અને ત્યાંથી નાસી છૂટ્યો હતો.
-
હત્યાની કલમ ઉમેરાઈ: ગંભીર રીતે ઘવાયેલા યુવકને તાત્કાલિક રાજકોટની સરકારી હોસ્પિટલમાં ખસેડવામાં આવ્યા હતા, જ્યાં સારવાર દરમિયાન તેમણે દમ તોડ્યો હતો.
-
પોલીસ કાર્યવાહી: શાપર-વેરાવળ પોલીસે પત્ની સંજુની ફરિયાદના આધારે ગુનો નોંધી, કેસમાં હત્યાની કલમનો ઉમેરો કરવા કોર્ટમાં રિપોર્ટ કર્યો છે. પોલીસે આરોપી સાઢુ અમરેન્દ્રસિંહની ધરપકડ કરી વધુ તપાસ હાથ ધરી છે.
