શ્રાવણ માસના પવિત્ર દિવસો દરમિયાન શ્રદ્ધાળુઓના સ્વાસ્થ્ય અને શ્રદ્ધા સાથે ખીલવાડ કરતા ભેળસેળિયા તત્વો સામે ગુજરાત સરકારે ‘ઝીરો ટોલરન્સ’ નીતિ અપનાવી છે. આરોગ્ય મંત્રી પ્રફુલ પાનશેરીયાએ નાગરિકોને શ્રાવણ માસની શુભકામનાઓ આપતાં સ્પષ્ટ કર્યું છે કે, વધુ નફો કમાવાની લાલચમાં બનાવટી ખાદ્ય સામગ્રી વેચનારાઓ સામે કડકમાં કડક કાનૂની કાર્યવાહી કરવામાં આવશે.
‘પૂજા માટેનું ઘી’ અને નકલી ડેરી પ્રોડક્ટ્સથી સાવધ રહેવા અપીલ
-
‘પૂજાનું ઘી’ ખરીદવાનું ટાળો: મંત્રીશ્રીએ નાગરિકોને અપીલ કરી છે કે માત્ર ‘પૂજા માટેનું ઘી’ લેબલ જોઈને ઘી ન ખરીદવું, કારણ કે તે ભેળસેળયુક્ત હોઈ શકે છે. આવા નકલી ઘીનું ઉત્પાદન કરતી ફેક્ટરીઓને શોધીને સીલ કરવામાં આવી છે.
-
સસ્તા ભાવથી સાવધાન: સહકારી મંડળીઓ કે જાણીતી બ્રાન્ડ્સના નિયત દર કરતાં ખૂબ જ ઓછા ભાવે મળતું દૂધ કે ઘી ન ખરીદવા સૂચના આપવામાં આવી છે.
-
સાત્વિક અને સુરક્ષિત વિકલ્પ: શ્રદ્ધાળુઓએ શક્ય હોય ત્યાં સુધી ખાદ્યસામગ્રી ઘરે જ બનાવવી અથવા માન્ય કંપની અને પ્રમાણિક ગૃહ ઉદ્યોગ પાસેથી જ ખરીદવી.
‘ભેળસેળ મુક્ત ગુજરાત’ અભિયાન અને સઘન તપાસ
-
રાજ્યવ્યાપી દરોડા: ખોરાક અને ઔષધ નિયમન તંત્ર દ્વારા સમગ્ર ગુજરાતમાં ફરાળી લોટ, માવો, પનીર, અનાલોગ પનીર, ચીઝ, ઘી, બટર અને દૂધ જેવી સામગ્રીનું સઘન ચેકિંગ હાથ ધરીને દરોડા પાડવામાં આવી રહ્યા છે.
-
જનજાગૃતિ સૌથી મોટું શસ્ત્ર: આ મહાઅભિયાનમાં જાગૃતિ ફેલાવવા બદલ મંત્રીશ્રીએ મીડિયાની ભૂમિકાને બિરદાવી હતી અને જણાવ્યું કે વેપારીઓની ગેરકાયદેસર પ્રવૃત્તિઓ અટકાવવા ગ્રાહકોની સજાગતા અત્યંત જરૂરી છે.
આરોગ્ય વિભાગની ટીમો દ્વારા આગામી દિવસોમાં પણ બનાવટી અને બિન-અધિકૃત ડેરી ઉત્પાદનો સામે કડક કાર્યવાહી અને સઘન ચેકિંગ ઝુંબેશ ચાલુ રાખવામાં આવશે.
