મુખ્ય ચૂંટણી કમિશનર જ્ઞાનેશ કુમારના રાજીનામાની માંગ વચ્ચે ભારતીય ચૂંટણી પંચ દ્વારા મતદાર યાદી સુધારણા મુદ્દે મોટું ડેમેજ કંટ્રોલ હાથ ધરવામાં આવ્યું છે. પંચે તમામ રાજ્યો અને કેન્દ્રશાસિત પ્રદેશોના મુખ્ય ચૂંટણી અધિકારીઓને (CEOs) આદેશ આપ્યો છે કે સ્પેશિયલ ઇન્ટેન્સિવ રિવિઝન (SIR) ની પ્રક્રિયા દરમિયાન રહી ગયેલા પાત્ર મતદારોના નામો આગામી એક મહિનામાં ફરી યાદીમાં ઉમેરવામાં આવે.
આ અભિયાન હેઠળ બૂથ લેવલ ઓફિસર્સ (BLOs) ને દર અઠવાડિયે ૨૦ થી ૨૫ ઘરોની મુલાકાત લઈને ચકાસણી કરવા અને ફોર્મ ૬ ભરાવી નામ નોંધવાની જવાબદારી સોંપાઈ છે. સાથે જ બેઘર, મજૂરો અને હાંસિયામાં ધકેલાયેલા લોકો માટે વિશેષ શિબિરોનું આયોજન પણ કરવામાં આવશે.
ચૂંટણી પંચના નિર્દેશો અને SIR અભિયાનના મુખ્ય મુદ્દાઓ:
-
ઘરે-ઘરે ચકાસણી: BLOs દ્વારા પૂર્વ-SIR અને વર્તમાન મતદાર યાદીની સરખામણી કરી છૂટી ગયેલા પાત્ર નાગરિકોના ઘરોની રૂબરૂ મુલાકાત લઈને નામ નોંધવામાં આવશે.
-
વિશેષ કેમ્પ્સનું આયોજન: નાગરિકોની સરળતા માટે બૂથ લેવલ કેમ્પ્સ તેમજ નાઈટ શેલ્ટર અને મજૂર વસાહતોમાં ખાસ શિબિરો યોજાશે.
-
૧૩.૩ કરોડ નામો કમી થયા: SIR પ્રક્રિયા અંતર્ગત દેશભરમાંથી અત્યાર સુધીમાં આશરે ૧૩.૩ કરોડ નામો યાદીમાંથી કમી (Deletion) કરવામાં આવ્યા છે.
-
સતત પ્રક્રિયા: પંચના જણાવ્યા મુજબ મતદાર નોંધણી સતત ચાલતી પ્રક્રિયા છે અને વંચિત રહી ગયેલા પાત્ર નાગરિકો ફોર્મ ૬ ભરીને ગમે ત્યારે પોતાનું નામ ઉમેરાવી શકે છે.
ચૂંટણી પંચના આ આદેશથી મતદાર યાદીમાંથી નામ કમી થવા અંગે ઉઠેલા વિવાદો વચ્ચે પાત્ર નાગરિકોને ફરી નામ નોંધાવવાની તક મળશે.
