રાજકોટમાં Ph.Dનો અભ્યાસ કરતી યુવતીને પ્રેમજાળમાં ફસાવી, લગ્નની લાલચ આપી અવારનવાર શારીરિક સંબંધ બાંધી ગર્ભવતી બનાવવાનો કિસ્સો સામે આવ્યો છે. આરોપીએ ગર્ભપાત કરાવી દીધા બાદ વોટ્સએપ પર માફીનો મેસેજ મોકલી યુવતીનો નંબર બ્લોક કરી દીધો હતો. યુવતીની ફરિયાદના આધારે રાજકોટ એ-ડિવિઝન પોલીસે આરોપી ચિંતન મકવાણાની ધરપકડ કરી છે.
કોલેજકાળ દરમિયાન પ્રેમ સંબંધ અને હોટલોમાં શારીરિક સંબંધ
-
પરિચય: જૂનાગઢની મૂળ વતની અને હાલ રાજકોટમાં રહી Ph.Dનો અભ્યાસ કરતી યુવતી 2021માં જેતપુરની કોલેજમાં BA કરતી હતી ત્યારે B.Comમાં ભણતા ચિંતન મકવાણા સાથે પરિચય થયો હતો.
-
હોટલોમાં સંબંધ: વર્ષ 2022માં યુવતી રાજકોટ આવ્યા બાદ ચિંતન અવારનવાર મળવા આવતો હતો. ફેબ્રુઆરી 2023માં કિસાનપરા ચોક પાસેની હોટલ સહિત અન્ય સ્થળોએ લગ્ન કરવાની ખાતરી આપીને શારીરિક સંબંધ બાંધ્યા હતા.
ગર્ભપાત કરાવ્યો અને ચોટીલામાં સેંથો પૂર્યો
-
ગર્ભપાત: જુલાઈ 2024માં યુવતીને 2 માસનો ગર્ભ રહી જતાં આરોપીએ ગર્ભપાતની દવા મોકલી આપી હતી.
-
ચોટીલામાં સેંથો પૂર્યો: વર્ષ 2025માં બંને ચોટીલા ગયા ત્યારે ચિંતને યુવતીનો સેંથો પૂરી માતાજીની સાક્ષીએ પત્ની તરીકે સ્વીકારી હતી, પરંતુ બાદમાં લગ્ન કરવાનો સતત ઇનકાર કરતો હતો.
કોર્ટ મેરેજના નામે છેતરપિંડી અને ધરપકડ
-
નંબર બ્લોક કર્યો: ઓગસ્ટ 2026માં કોર્ટ મેરેજ નક્કી કર્યા બાદ ચિંતન યુવતીને જેતપુર પોતાના ઘરે લઈ જવાને બદલે સંબંધીના ઘરે લઈ ગયો હતો. ત્યાંથી તે નીકળી ગયો અને વોટ્સએપમાં માફીનો મેસેજ મોકલી યુવતીનો નંબર બ્લોક કરી દીધો હતો.
-
પોલીસ કાર્યવાહી: પીડિતાની ફરિયાદ પરથી રાજકોટ એ-ડિવિઝન પોલીસે આરોપી ચિંતન મકવાણા સામે ગુનો નોંધી તેની ધરપકડ કરીને આગળની કાયદેસરની કાર્યવાહી હાથ ધરી છે.
