જમ્મુ-કાશ્મીરમાં આતંકવાદ સામેની કાર્યવાહી વધુ મજબૂત બનાવવા સુરક્ષા દળોની તૈનાતીમાં મહત્વનો ફેરફાર કરવામાં આવી રહ્યો છે. ઉધમપુર અને કઠુઆના 21 સ્થળોએ આશરે 2,100 CRPF જવાનો સેનાની જગ્યાએ જવાબદારી સંભાળશે. જંગલ વિસ્તારોમાં કામગીરી માટે CRPFની વિશેષ COBRA ટીમો પણ તૈનાત રહેશે.
સેનાને LoC અને સરહદ સુરક્ષા પર વધુ ફોકસ
નવી વ્યવસ્થાનો મુખ્ય હેતુ સેનાને આંતરિક વિસ્તારોની નિયમિત આતંકવાદ વિરોધી કામગીરીમાંથી કેટલીક હદે મુક્ત કરવાનો છે. CRPF આંતરિક વિસ્તારોમાં સર્ચ અને કાઉન્ટર-ટેરર ઓપરેશન સંભાળશે, જ્યારે સેના LoC અને આંતરરાષ્ટ્રીય સરહદની સુરક્ષા પર વધુ ધ્યાન કેન્દ્રિત કરી શકશે.
જંગલોમાં COBRA કમાન્ડોની તૈનાતી
ઉધમપુર અને કઠુઆના જંગલ તથા દૂરના વિસ્તારોમાં CRPFની કંપનીઓ સાથે COBRA કમાન્ડો પણ કામગીરી કરશે. આ વિશેષ દળને જંગલ યુદ્ધ અને આતંકવાદ વિરોધી ઓપરેશન માટે તાલીમ આપવામાં આવી છે.
અધિકારીઓના જણાવ્યા મુજબ, સરહદી વિસ્તારોમાં સેનાની જવાબદારી વધતા આંતરિક વિસ્તારોમાં સુરક્ષા વ્યવસ્થા મજબૂત કરવાની જરૂરિયાત ઊભી થઈ છે. નવી જવાબદારી વહેંચણીથી સેના અને CRPF વચ્ચે કામગીરી વધુ સ્પષ્ટ બનવાની સાથે આતંકવાદ વિરોધી ઓપરેશનમાં સંકલન સુધરવાની અપેક્ષા છે.
