સુરેન્દ્રનગરમાં ‘શુદ્ધિકરણ’ના નામે અમાનુષી અત્યાચાર: પ્રેમી સાથે ભાગેલી પરિણીતા પર સામૂહિક દુષ્કર્મ, પતિ સહિત ૯ આરોપીઓની ધરપકડ

સુરેન્દ્રનગરમાં ‘શુદ્ધિકરણ’ ના નામે અમાનુષી અત્યાચાર, પ્રેમી સાથે ભાગેલી પરિણીતા પર સામૂહિક દુષ્કર્મ, પતિ સહિત 9 આરોપી ઝડપાયા

સુરેન્દ્રનગરના દુધરેજ વહાણવટી નગરમાં માનવતાને શરમાવે તેવી અને સમગ્ર વિસ્તારમાં ખળભળાટ મચાવતી એક અત્યંત આઘાતજનક ઘટના સામે આવી છે. અહીં એક પરિણીતા પોતાના પ્રેમી સાથે ઘર છોડીને જતી રહી હતી, જેને પરિવારજનો અને પતિ દ્વારા શોધીને પરત લાવ્યા બાદ અંધવિશ્વાસ અને કુરિવાજોની આડમાં અમાનુષી અત્યાચાર ગુજારવામાં આવ્યો હતો.

ઘટનાની મુખ્ય વિગતો અને અત્યાચાર:

• સામૂહિક દુષ્કર્મનો ગંભીર આક્ષેપ: પરિણીતાને પરત લાવ્યા બાદ ‘શુદ્ધિકરણ’ કરવાના બહાને તેને ઘરમાં ગોંધી રાખીને તેની પર સામૂહિક દુષ્કર્મ આચરવામાં આવ્યું હોવાનો ગંભીર આક્ષેપ મૂકવામાં આવ્યો છે.

• યુવક પર ક્રૂરતા: આ ઘટનામાં માત્ર મહિલા જ નહીં, પરંતુ તેની સાથે આવેલા યુવકને પણ ઝાડ અને ખાટલા સાથે દોરડાથી બાંધીને બેરહેમીથી ઢોર માર મારવામાં આવ્યો હતો. એટલું જ નહીં, તેને અમાનુષી રીતે પેશાબ પીવડાવવામાં આવ્યો હોવાની શરમજનક વિગતો પણ બહાર આવી છે.

• વાયરલ વીડિયો: આરોપીઓ દ્વારા આ સમગ્ર ક્રૂર કૃત્યનો વીડિયો બનાવીને સોશિયલ મીડિયા પર વાયરલ કરવામાં આવ્યો હતો, જે પોલીસ અધિકારીઓ સુધી પહોંચતા જ તંત્રમાં દોડધામ મચી ગઈ હતી.

પોલીસ કાર્યવાહી:

વીડિયો વાયરલ થતાં જ સક્રિય થયેલી પોલીસે ત્વરિત કાયદેસરની કાર્યવાહી હાથ ધરી છે. મુખ્ય સૂત્રધાર પતિ રમેશ સરવૈયા તેમજ જયંતી સરવૈયા, ભરત સરવૈયા, જીતુ સરવૈયા, પપ્પુ પરમાર, કલા સરવૈયા, ગીતાબેન સરવૈયા અને લીલાબેન સરવૈયા સહિત કુલ ૨ મહિલા અને ૭ પુરુષો મળીને ૯ આરોપીઓની ધરપકડ કરી લેવામાં આવી છે. જિલ્લા પોલીસ વડાએ જણાવ્યું છે કે આ પ્રકરણમાં સંડોવાયેલા અન્ય શખ્સો સામે પણ કડક કાનૂની પગલાં લેવામાં આવશે.